Belia x Ramadan

بلية × رمضان .. (الحلقة الثانية)

عدنا بعد غيبة طالت بعض الوقت, ولكن لتصدينا لحملة المسلسلات .. قمنا بتأجيل الحلقة الثانية, ومساندة لدولة ماليزيا الشقيقة التى تمنع المسلسلات وأى برامج مشوقة على التليفزيون المحلى حتى يتفرغ الشعب الماليزى للعبادة, ويا شماتة أبلة ظاظا فينا ,, أبلة ظاظا مين

ما علينا ...

عدنا ..

بلية خد علقة بالفلكة على رجله .. والأسطى خلاه يجرى عليها كمان بعد العلقة, وهو بيجرى, قعد يفكر ,, حتى وهو مضروب بيفكر, بس المرة دى فكر بجد ف قرار ...

كان صعب ياخد قرار ف سنه دا, بس اضطر ينضج فكريًا وقتها علشان ياخد قرار, وبقى عمره كثير أوى ,, بالنسبة لسنة..

بعد تفكير عميق, قام ماشى من الورشة, وراح المكتبة اللى جنب الورشة, اشترى كراسة وقلم بالإثنين جنيه اللى ف جيبه, وراح كاتب استقالة ,

تحية طيبة وبعد,

السيد الأسطى بتاع الورشة, أنا قررت بعد تفكير كثير, إنى أأدم استآلتى عن الورشة بتاعت حضرتك, لأنك انت مش بتعاملنى كويس, ولأن مافيش حد بيأدرنى خالص, وأنا الصراحا غلتان انى ما كملتش علام زى ما أمى كانت بتؤلى دايماً, وعلى العموم ربنا يوفأكم بقى, وأنا هشوف أكل عيشى ف حتة تانية

أخوك الصغنن : بلية

نزلت دمعة من بلية على الجواب, هو ماكانش ليه شغل دلوقتى أصلا ف سنه دا, ولا ف أخلاقه دى , ف مكان فيه بشر زى دول, مع إن دا غلط, لأن دا تقدير ربنا ليه, علشان يتعلم الحياة!


اتعلم بلية الدرس كويس .. وبدأ يدور على ورشة تانية, بس المرة دى, مع المدرسة, راح قدم ف المدرسة تانى, مع إنه إتأخر سنة بحالها.. دور بجد على ورشة تقدر مواهبه, وتستغل امكانياته بجد ..

فضل يدور كثير, تعب..


بس كان جواه يقين إن ربنا هيوفقه, ويقين إن رضا أمه عليه هينورله طريقه بعد ما رجع المدرسة..

كان جواه يقين ف الرزق, بعد التعب وبعد ما عمل اللى عليه ..

بلية دلوقتى ف رمضان, ويمكن رمضان علمه كثير, علمه الصبر, وعلمه القرار, وعلمه السيطرة على نفسه, علمه كثير أوى..

بلية بيصحى من النوم الفجر, بيصلى ف الجامع, ويقرا قرآن فى المقرأة علشان يتعلم قراية القرآن صح, وبيطلع يذاكر لحد معاد المدرسة, وبعد المدرسة بيرجع يدور على شغل لحد قبل الفطار ..

من بعد الفطار لحد العشا بيقعد مع أمه واخواته ويقرب منهم ويعرف مشاكلهم ويحاول يناقشهم فيها, وبعد العشا والتراويح بينام بدرى علشان يبدأ اليوم بتاعه تانى من الفجر...

____

هنعرف حصل ايه لبلية بعد قرار استقالته من الورشة..
وهل هو قرار صح أصلا ولا لأ!
وهل حتى لو كان صح, كان فيه أصح؟!
والأسطى عمل ايه لما شاف جواب بلية, ومالقاش بلية ف الورشة؟!

تقبل الله منا ومنكم صالح الأعمال



يتبع قريبًا بإذن الله ..

Belia we Dma3'oh El-3alya

بلية .. ودماغه العالية - الحلقة الأولى

كان فى واحد إسمه بلية , كان عنده دماغ كبيرة خالص, بس بينه وبينه وبس :) ,, حبة ناس يعرفوا دا, وعرفوه عن قرب قوى أوى ..

بس باقى الناس مش عارفين دا, كانت دماغه دى تشغله أسطى كبير فى أكبر ورشة فيكِ يا أرض :) .. بس ما حدش إداله الفرصة دى, فكان الناس اللى عارفين إن دماغه كبيرة, بيعرفوا يستغلوا دا ويستفادوا منه أوى,, وهو بيفرح إن فى حد فاهم دماغه وبيساعدهم أوى..

باقى الناس بقى ,, فاكرينه بلية ساذج وعبيط :) .. هو مش زعلان من دا, عادى, يعنى هيعملهم ايه يعنى, فكان بياخدهم على قد عقلهم, كانوا بيطلبوا منه حاجات عبيطة على قد الصورة اللى هما شايفينها, بسطحية, مش شايفين أى عمق, ولا حاولوا يلفوا حبة يشفوا باقى الزوايا..

روح يا بلية هات فطار .. حاضر
روح يا بلية هات مية .. حاضر
روح يا بلية أكنس الورشة .. حاضر
روح يا بلية صور الورقة دى .. حاضر
روح يا بلية وسط البلد هات شوية عدّة وبضاعة .. لأ

لأ .. كفاية بقى

أنا أقدر أشتغل مكان اللى بتسموه باشمهندس دا
أنا أقدر أحطلكم خطة لإدارة الورشة وزيادة الربح, وللدعايا للشغل بتاعنا

أنا ممكن أخليكم تاخدوا توكيل العربيات اللى بتصلحوها دى من الشركة الأم, أنا أعرف ناس فيها وبكلهم على النت, ممكن يساعدونا ف دا ..

أنا ممكن (بصوت عالى ووجه أحمر) ....$%%^&*)($@

اهدا يا بلية ,, معلش يا حبيبى, إحنا عارفين إن إنت تعبان من كثر الشغل..

روح يا إبن الـ .. تيييييييييييييييييييييييييت هات الفلكة عشان تتربى

%$^&)((&^%$
آااااااااااااااى .. حراااااااااااااااااااااااام
حرمت خلاص

... يتبع